BATI YAR | batyyar@mail.ru
İlk və gözlənilən məşqçi istefası baş verdi
Əvvəlki illərdən fərqli olaraq, budəfəki daxili klub futbol mövsümü başlayar-başlamaz Premyer liqa klubları ilə bağlı müzakirələrdə gözləmə mövqeyi tutmağa ehtiyac qalmadı. Çünki cəmi 8 komandası olan yarış iştirakçılarının tən yarısı Avropa arenasında çıxış etmişdi və püşklərin də nəticələrinə görə, tam formalaşma üçün kifayət qədər vaxt əldə etmişdilər.
Digər komandalardan yalnız debütant "Səbail"lə bağlı konkret fikir söyləmək olmaz. İlk növbədə, ona görə ki, ona hələ bu səviyyədə yarışa uyğunlaşmaq, bərkdən-boşdan çıxmaq fürsəti verilməlidir. "Neftçi", "Sumqayıt", "Gəncə" isə artıq neçənci ildir Avrokuboklara iddialı durumdadırlar.
İkinci tur ilk icmal qeydlərimizdə xüsusi vurğuladığımız, əslində, hələ ötən mövsümün qış fasiləsindən, yeri gəldikcə, təkrarladığımız məqamlardan birini, nəhayət, doğrultdu. "Neftçi" yenə baş məşqçisini dəyişdi. Bu isə çempionatlarımızın ən titullu klubunun yenə də özünə gəlmək üçün bir xeyli gözləyəcəyini və sönmüş ocağın külü ilə oynayacağını göstərir. Mövsümün ən hazırlıqsız komandası olduğunu "Neftçi" ikinci turda debütanta uduzmaqla da göstərdi. Əlbəttə, yaradılmış bir-iki epizoddan gileylənmək olar. Lakin komandanın ötən qışdan bu yana, ələlxüsus yay fasiləsində nə işlə məşğul olduğunu heç anlamaq mümkün deyil. Ya bivec yanaşma olub, ya da ənənəvi münasibət korluğu. Komanda elə dağınıq hazırlıq formasındadır ki, yeni məşqçi komandanın ipini yığmaq üçün əzab-əziyyətlərdən çıxmalıdır.
Təbii ki, vəziyyətin bu həddə qədər yuvarlanmasında, klub rəhbərliyinin rolu az deyil. Yaradılmış yeni idarəetmə sistemi, daha sonra onun dəyişdirilmiş forması özü artıq komandanın dağılan tifağının rüşeymləri idi və get-gedə böyüyür. Daha meydan kənarında komandanın azarkeşlərinin sayı da optimal aşağı həddə düşüb. Çünki bu münasibət də tam fərqlidir. Halbuki məhz "Neftçi" azarkeşlərinin gücü və rolu, ən əsası, onların dayanıqlığı və komandaya təsirləri az-çox digər klublara nümunə idi.
Yaranmış vəziyyətdən çıxış yolu isə yalnız güclü, iradəli, qətiyyətli və işinə kiminsə mane ola bilməyəcəyi bir şəxsiyyətin baş məşqçi kürsüsünə gətirilməsidir. Ya da ki, klub sanballı əcnəbi mütəxəssis gətirib ona kard-blanş verməlidir.
Mövsümün ən hazırlıqlı klubları sırasında "Zirə"nin öz yeri var. Lakin komanda Avrokubok oyunlarında debütant olsa da, öz imkanları həddində çıxış edə bilmədi. Hərçənd həmin qarşılaşmalar "Zirə"nin ölkə çempionatına tam hazırlıqlı qoşulmasına kömək etdi. İndi 3 qarşılaşma ərzində paytaxt təmsilçisinin turdan-tura daha kompakt oyuna meyilli olduğunu müşahidə etmək mümkündür. Bu vəziyyətin nə qədər sabit və inkişaflı olacağı indi günün məsələsinə çevrilib. Çünki elə son matçda bir sıra xroniki problemlər əyani görünür. Birinci məsələ komandanın hələ də ikiplanlı oyun qura bilməməsidir. Əgər hədəf gələn ilin də Avropa arenasıdırsa, bir sıra prinsiplərdə dəyişiklik baş verməlidir. Hətta gələn yaya qədər bunu təkamüllə yüksəltmək də olar.
"Kəpəz"lə "Sumqayıt"da ötən illə müqayisədə dəyişən bir şey yoxdur. Daha doğrusu, Abşeron təmsilçisi Gəncə təmsilçisi ilə müqayisədə bir qədər optimal hazırlıqlı görünür. Çünki "Kəpəz"də baş verən transfer və oyun siyasətinin təməli qaranlıq məsələyə çevrilib. Belə olmadıqda, hansısa sabitlikdən bəhs etmək düz deyil.
Çempionlar Liqasında yer almış "Qarabağ"ın bu uğurdan sonra ilk sınağı ən prinsipial mövsüm rəqibi "Qəbələ" ilə olması lap yerinə düşdü. Komandanın bu matça yarıəsas heyətlə çıxması çox maraqlı addım idi. Sirr deyil ki, çempionatın qədərini məhz bu klubların arasında keçiriləcək dörd matç həll edir. "Qəbələ" hətta bu halda belə rəqibinə sinə gərə bilmədi, səviyyələr
arasındakı fərqi əyani nümayiş etdirdi. İkinci hissədə "Qarabağ"ın daha iki aparıcı oyunçunu meydana daxil etməklə, elə də böyük səy göstərmədən istədiyi nəticəyə yetişdi. Bu isə iki komanda arasındakı fərqlə bağlı deyilənləri bir daha təsdiq edir. Halbuki son illərdə "Qəbələ" sabitliyin açarını tapmalıydı. Bunun nə üçün, niyə və nədən baş vermədiyinə isə qarşıdakı turlarda bir daha qayıdacağıq. Hələlik bir məqamı xüsusi vurğulayaq. İlk üç turla, xüsusən Avrokubokla müqayisədə komandanın oyun planında bir qədər geriləməsi müşahidə olunur. Bu, iki yarışa fərqli münasibət formalaşdıran çempionatda limit qaydası səbəbilə həmin tendensiya ilə irəliləyə bilməyən bir komanda üçün ilk mənfi göstəricidir. Məşqçi korpusu nə əlindəki heyətlə, nə də istədiyi heyətlə oyun qura bilir. Çempionatın daxili münasibətlərdə ən loyal və sabit komandasının düşdüyü bu vəziyyətə, yəqin, qarşıdakı turlarda aydınlıq gətiriləcək.
"Qarabağ"a bu tur az suallar vermədi. Komandanın oyunu, ilk növbədə, Avropa səviyyəsi ilə ölçülür. Dar ehtiyat oyunçular skamyasının nə olduğunu "Qəbələ" ilə matç göstərdi. Doğrudur, taktiki planda məşqçi korpusunun fərqli yanaşması alqışlana bilər. Bununla belə, bu gün "Qəbələ" ilə yalnız başabaş mübarizə aparan yarıəsas heyət, sabah "Roma", "Çelsi", "Atletiko" kimi nəhənglərlə hansı vəziyyətdə olacağını indidən düşünmək lazımdır.
|
