Bakıda keçiriləcək IV İslam Oyunlarının ağır atletika yarışlarında iştirak edəcək Səudiyyə Ərəbistanı yığmasının nümayəndələri Bakıya gəliblər.
Azərbaycan Ağır Atletika Federasiyasından (AAAF) bildiriblər ki, səfərin məqsədi ölkəmizdə Oyunlara yaxşı hazırlaşmaq üçün təlim-məşq toplanışına münasib məkan seçməkdir. Qonaqlara ağır atletika üzrə milli komandaların mərkəzi məşq bazası olan “AAAF Park” yaşayış kompleksi tövsiyə edilib.
Qonaqları AAAF-ın vitse-prezidentləri Azər Əliyev, Tofiq Heydərov və Ruslan Xanverdiyev, həmçinin baş katib Rizvan Rəsulov müşayiət ediblər.
Ağır atletika üzrə Səudiyyə Ərəbistanı yığmasının baş məşqçisi Hoseyn Əlsalis və Səudiyyə Ərəbistanı Milli Olimpiya Komitəsinin mütəxəssisi Nəvaf Bendexayel burada yaradılan şəraitlə tanış olublar. Onlara buradakı məşq və yarış zalı, fitnes mərkəzi, futbol və tennis meydançaları, gimnastika və cüdo zalı, həmçinin istirahət və bərpa üçün nəzərdə tutulan bütün obyektlər nümayiş etdirilib. Bildirilib ki, Azərbaycanda ağır atletikanın inkişafı üçün mühüm tədbirlər görülür. Regionlarda zallar tikilir, mövcud infrastruktur yenilənir, yeniyetmə və gənc atletlərin təhsilinə xüsusi önəm verilir, onların qidalanma, istirahət və məşq prosesinə ən yüksək səviyyədə diqqət yetirilir, bütün gərəkli addımlar atılır.
Səudiyyə Ərəbistanında ağır atletikanın inkişafında yeni dövrün başlandığını, öz ölkələrində idmanın bu növünə münasibətin xeyli dəyişdiyini və Azərbaycan kimi ölkələrin təcrübəsinə ehtiyacı olduqlarını qeyd edən qonaqlar burada gördüklərindən heyrətə gəldiklərini bildiriblər. Onlar ağır atletlərin yüksək səviyyədə hazırlığı üçün lazım olan bütün obyektlərin bir arada, bu qədər yaxın və səmərəli olmasını dünyanın heç bir yerində görmədiklərini diqqətə çatdırıblar. Azərbaycanda ağır atletikaya diqqət və qayğının nümunəvi olduğunu qeyd edən qonaqlar Səudiyyə Ərəbistanı yığmasının təlim-məşq toplanışı üçün ölkəmizə gəlməkdə qətiyyətli olduqlarını bildiriblər.
“Dəyirmi masa” arxasında keçirilən görüşdə AAAF rəhbərliyi Səudiyyə Ərəbistanından olan atletlərin ölkəmizdə təlim-məşq toplanışı üçün hər cür imkanın yaradılacağını bildiriblər. Söhbət zamanı IV İslam Həmrəyliyi Oyunlarının ən yüksək səviyyədə təşkil olunacağına əminlik ifadə edilib, Azərbaycanın ilk Avropa Oyunlarına uğurla ev sahibliyi etdiyi xüsusi vurğulanıb.
AAAF-ın vitse-prezidenti Azər Əliyev Azərbaycanda idmanın bütün növlərinə dövlət səviyyəsində yüksək diqqət və qayğı göstərildiyini, qitə və dünya çempionatlarında, Olimpiya Oyunlarında əldə edilən uğurların bunun göstəricisi olduğunu bildirib. O, Səudiyyə Ərəbistanı yığma komandasının həm Azərbaycanda keçirəcəyi təlim-məşq toplanışından, həm də İslam Həmrəyliyi Oyunlarının yüksək təşkilatçılıq səviyyəsindən razı qalacağını qeyd edib.
Qonaqlar təlim-məşq bazasından və yaradılan şəraitdən xeyli razı qaldıqlarını bir daha vurğulayıb, ölkələrinin ağır atletika yığmalarının “Bakı-2017”dən əvvəl məhz Azərbaycanda hazırlıq keçəcəkləri barədə qərar qəbul etdiklərini bildiriblər.
Görüşdə əməkdaşlıq əlaqələrinin gələcəkdə daha da genişləndirilməsi məsələləri müzakirə edilib, bu barədə qəti inam ifadə olunub.
|
