VII yazı
Lisenziyalar necə qazanılır?
“Rio-2016” Yay Olimpiya Oyunlarının ən maraqlı yarışları komanda idman növlərindəki mübarizə olacaq. Bu yarışlar təkcə iştirakçı sayının çoxluğu ilə deyil, həm də kütləviliyi təmin etməsi ilə fərqlənir. Olimpiadaya doğru komandaların keçdiyi yollar da hər bir komanda növündə özünəməxsusdur. Olimpiadanın təsnifat yarışlarının 7-ci məqaləsini qapalı zallarda keçən növlərə həsr edirik.
Basketbol
Qarşıdakı seçmələr - kişilər: 4-10 iyul 2016 (Qitələrarası 3 olimpiya təsnifat turniri); qadınlar: 13-19 iyun 2016 (Qitələrarası olimpiya təsnifat turniri).
Əsas yarışlar - dünya və qitə çempionatları artıq başa çatıb. Gözlənildiyi kimi, 2014-cü ildə keçirilmiş dünya çempionatlarının qalibləri ABŞ-ın hər iki kollektivi olub. Kişilər avqustun 31-dən sentyabrın 14-dək İspaniyada, qadınlar isə sentyabrın 27-dən oktyabrın 5-dək Türkiyədə keçirilən yarışların qalibləri olublar. Bu il avqustun 5-də elan olundu ki, ev sahibi də basketbol turnirlərinin tam heyətli iştirakçısı olacaq.
Qalan komandalar üçün seçim qitə yarışları idi. Kişilərdə 2 qitə çempionatı iki komanda çıxarıb. Xorvatiya (Zaqreb), Fransa (Monpelye və Lill), Almaniya (Berlin) və Latviyanın (Riqa) birgə təşkilatçılığı ilə keçirilən Avropa çempionatında (5-20 sentyabr 2015) finalçılar İspaniya və Litva, Mexikoda isə (31 avqust-12 sentyabr 2015) Venesuela və Argentina lisenziya sahibi oldular. Bundan savayı, qitələr üzrə Avstraliya, Çin, Nigeriya da vəsiqə əldə ediblər.
Daha 3 vəsiqəni seçmə turnirlər müəyyən edəcək. Hərəsində 6 komanda olan 3 turnirdə yarışacaqlar. Seçmə turnirin məkanı yanvarın 19-da Hindistanın paytaxtı Dehlidə seçiləcək. Bu üç turnirə qitə yarışından qatıla bilməyən Türkiyə, Rusiya və Almaniya iddialıdırlar. FİBA seçim edərək, Serbiya, İtaliya, Türkiyə, Çex Respublikası, Almaniya və Filippinin namizədliyini təsdiq edib. 3 turnirə Avropadan Fransa, Serbiya, Yunanıstan, İtaliya və Çex Respublikası, Amerikadan Kanada, Meksika və Puerto Riko, Afrikadan Anqola, Tunis və Seneqal, Asiyadan Filippin, İran və Yaponiya, nəhayət, Okeaniyadan Yeni Zelandiya qatılacaqlar.
Qadınların turnirində ABŞ və ev sahiblərindən savayı, qitə çempionları da yarışacaqlar. Avropada Macarıstan (Budapeşt, Debreseni, Qyor, Sombathey və Şopron) və Rumıniyanın (Oradya və Timişoara) təşkilatçılığı ilə keçirilən çempionatda (11-28 iyun 2015) Serbiya qalib gəlib. Digər qitələrdən Kanada, Avstraliya, Yaponiya və Seneqal çıxıblar. Daha 5 vəsiqə lisenziya turnrində oynanılacaq.
Fransa və İspaniyanın iddialı olduqları təsnifat turnirinə həmin komandalarla yanaşı, Avropadan Belarus və Türkiyə, Amerikadan Kuba, Argentina və Venesuela, Afrikadan Kamerun və Nigeriya, Asiyadan Çin və Cənubi Koreya, Okeaniyadan Yeni Zelandiya qatılacaqlar. 12 komanda 4 qruda yarışacaq və iki komanda pley-offa vəsiqə əldə edəcək. 1/4 finalın qalibləri birbaşa olimpiadaya yollanacaqlar. Məğlublar isə öz aralarında iki mərhələdən ibarət yarışda daha bir vəsiqənin sahibini aşkar edəcəklər.
Olimpiadada hər kateqoriya üzrə 12 komanda mübarizə aparacaq. Hər komandanın heyətinə 12 basketbolçu daxil olacaq. Cəmi 288 basketbolçu olimpiyaçı statusuna sahib çıxacaq. Mübarizə avqustun 6-da başlanıb, 21-də yekunlaşdırılacaq. Yarışlar Barradakı Olimpiya parkının 16 min nəfərlik 1-ci arenasında keçiriləcək.
Həndbol
Qarşıdakı seçmələr - kişilər: 17-31 yanvar 2016. Krakov, Sopot, Katovise, Lodz və Vrotslav - Polşa (Avropa çempionatı), 7-10 aprel 2016 (Qitələrarası olimpiya təsnifat turniri); qadınlar: 17-20 mart 2016 (Qitələrarası 3 olimpiya təsnifat turniri).
Dünya və qitə çempionatlarından olimpiadaya vəsiqə qazananların bir qisminin adı artıq məlumdur. Ev sahibi Braziliya ilə yanaşı, kişilərdə 2015-ci il yanvarın 15-dən fevralın 1-dək Qətərdə keçirilmiş dünya çempionatının qalibi Fransadan başqa, Amerikadan Kanada, Asiyadan Qətər vəsiqə sahibidirlər. Avropa və Afrika çempionları da bu sıraya qoşulacaqlar. Polşadakı Avropa çempionatında dünya Çempionu Fransanın başçılığı ilə "A" qrupunda Polşa, Makedoniya və Serbiya, "B"də Xorvatiya, İslandiya, Norveç, və Belarus, "C"-də İspaniya, İsveç, Almaniya və Sloveniya, "D"-də Danimarka,Macarıstan, Rusiya və Monteneqro yarışacaqlar. Buradan ya qalib, ya da finalda Fransaya uduzan birbaşa Braziliyaya vəsiqə əldə edir. Sonrakı iki komanda qitələrarası təsnifata yollanacaq. Həmin yarışda Çili, İran və Bəhreynin yarışacağı bəllidir.
Qadınlarda, əksinə, hələ dünya çempionatı keçirilir. Dekabrın 5-dən 20-dək Danimarkanın Herninq, Kollinq, Frederikshavn və Nestved şəhərlərində keçirilmiş dünya çempionatının qalibi kimi, Norveç Braziliyaya yollanmaq hüququ əldə edib. Doğrudur, onlar daha əvvəl Avropa çempionatında lisenziya sahibi olmuşdular. Lakin indiki vəziyyətdə 2014-cü il dekabrın 7-dən 21-dək Macarıstanın Budapeşt, Debreseni və Qyor, Xorvatiyanın Zaqreb, Varajdin və Osiyek şəhərlərində keçirilmiş qitə çempionatında Norveçlə yanaşı, finalda yer almış İspaniya kollektivi də avtomatik "Rio-2016"nın iştirakçısına çevrilib. Olimpiadada qitələr üzrə Anqola (Afrika), Argentina (Amerika) və Cənubi Koreya da (Asiya) yarışacaqlar.
Qitələrarası təsnifat yarışında isə mundialın 7 komandası ilə yanaşı, qitələr üzrə reytinqə əsasən, rəqabətdə 2-ci və 3-cü ən yaxşılar da bu sırada yer alacaqlar. Qitələrin reytinqi dünya çempionatından sonra müəyyən olunub. Amerikadan Uruqvay və Meksika, Asiyadan Yaponiya, Afrikadan Tunis təsnifat yarışlarına vəsiqə əldə ediblər. Qalan komandalar Avropanı təmsil edəcəklər: Niderdand, Polşa, Rumıniya, Rusiya, Danimarka, Fransa və Avropa çempionatının 4-cüsü kimi - Monteneqro.
2016-cı il 17-20 mart aralığında keçiriləcək 3 olimpiya təsnifat turnirinin heyəti isə belə müəyyənləşib: 1-ci qrup: Niderdand, Fransa, Yaponiya və Tunis; 2-ci qrup: Rumıniya, Danimarka, Monteneqro və Uruqvay; 3-cü qrup: Polşa, Rusiya, Meksika.
Yarışların ev sahibləri yeni ildə müəyyənləşəcək. "Rio-2016"nın olimpiya turniri avqustun 6-dan 21-dək, hər iki kateqoriya üzrə 24 komandanın iştirakı ilə, Barradakı Olimpiya parkında keçiriləcək.
Voleybol
Qarşıdakı seçmələr - kişilər: 5-10 yanvar 2016. Berlin, Almaniya (Avropa olimpiya təsnifat turniri), 15 may-5 iyun 2016. Tokio, Yaponiya (Dünya olimpiya təsnifat turniri, 3 vəsiqə) və Tokio, Yaponiya (Qitələrarası olimpiya təsnifat turniri, 1 vəsiqə); qadınlar: 4-9 yanvar 2016. Ankara, Türkiyə (Avropa olimpiya təsnifat turniri), 15 may-5 iyun 2016. Tokio, Yaponiya (Dünya olimpiya təsnifat turniri, 3 vəsiqə) və Tokio, Yaponiya (Qitələrarası olimpiya təsnifat turniri, 1 vəsiqə).
Ev sahibinin hər iki turnirdə qələbə uğrunda yarışan komanda çıxaracağı turnirdə, dünya kubokunun qalibi kimi - kişilərdə (8-23 sentyabr 2015, Yaponiya) ABŞ, finalçı İtaliya, qadınlarda (22 avqust-6 sentyabr 2015, Yaponiya) Çin və finalçı Serbiya da qələbəyə əsas iddiaçılar sırasında yer alacaqlar. Qitələr üzrə yarışlarda isə bir qalib məlumdur: kişilərin turnirində Argentina Amerikanın təmsilçisidir.
Kişilər arasında Berlindəki turnirdə Avropadan ev sahibi ilə yanaşı, həmin qrupda yer alan Polşa, Serbiya və Belçika, digər qrupda isə Rusiya, Bolqarıstan, Fransa və Finlandiya yarışacaqlar. Qalib komanda olimpiadaya, sonrakı iki yerin sahibi dünya təsnifatına yollanacaqlar.
Dünya təsnifatında isə ev sahibi Yaponiya ilə yanaşı, Asiya üzrə dünya reytinqinə əsasən, Çin, İran və Cənubi Amerikanın 3-cüsü Venesuelanın yer alacağı bəllidir. Qitələrarası təsnifatda Cənubi Amerikadan Çili oynayacaq. Qalanları bəlli deyil.
Qadınlarda da yarışlar eyni qayda ilə keçiriləcək. Ankaradakı Avropa təsnifatında ev sahibi Türkiyə ilə yanaşı, Almaniya, Niderland və Xorvatiya "A", Rusiya, İtaliya, Belçika və Polşa "B" qrupunda mübarizə aparacaqlar. Qalib olimpiadaya, sonrakı iki yerin sahibi isə dünya təsnifatına yollanacaq. Dünya təsnifatında ev sahibi Yaponiya ilə bərabər, dünya reytinqinin Asiya üzrə nəticələrinə əsasən, Cənubi Koreya, Tailand və Qazaxıstan yer alacaqlar. Qalanları sonradan yarışlar ələyindən keçirilərək seçiləcəklər.
24 komandanın və ya 288 idmançının qatılacağı olimpiya turniri avqustun 6-dan 21-dək məşhur "Marakana"nın "Cinasiu du Marakanzinyu" arenasında keçiriləcək.
Su polosu
Qarşıdakı seçmələr - kişilər: 10-23 yanvar 2016. Belqrad, Serbiya (Avropa çempionatı), 3-10 aprel 2016. Triyest, İtlaiya (Dünya olimpiya təsnifat turniri, 3 vəsiqə); qadınlar: 10-22 yanvar 2016. Belqrad, Serbiya (Avropa çempionatı), 21-28 mart 2016. Qauda, Niderland (Dünya olimpiya təsnifat turniri, 3 vəsiqə).
Bu yarışlar üçün bir neçə seçmə yarış imkanı var. Kişilərdə 12 komanda sırasına düşmək üçün ilk fürsət İtaliyanın Berqamo şəhərində 2015-ci il iyunun 23-28-də keçirilmiş Dünya Liqasının superfinalı idi və onu Serbiya qalib kimi başa vurub, olimpiya yarışının ev sahibi Braziliya ilə birlikdə, iştirakçılar siyahısına başçılıq etməyə başladı. Kazandakı dünya çempionatında isə (27 iyul-8 avqust 2015) Serbiya, qalib gəlsə də, artıq lisenziya yiyəsi olduğundan, finalçı Xorvatiya və bürünc medalçı Yunanıstan vəsiqə sahibi oldular. Amerikadan Braziliya yolçuluğuna ABŞ komandası çıxıb.
Serbiyadakı qitə çempionatında ev sahibi ilə yanaşı, Xorvatiya və Yunanıstan lisenziya sahibləri olduqlarından, məsələ bir az da asanlaşıb. İndi yeganə lisenziyanı Macarıstan, İtaliya, Monteneqro, İspaniya, Rumıniya, Niderland, Gürcüstan, Fransa, Slovakiya, Almaniya, Malta, Rusiya və Türkiyə komandalarından biri qazanacaq.
İtaliyadakı dünya təsnifat turnirinə Avropadan 5, Asiyadan 2, Afrika və Okeaniyadan 1 komanda qatıla bilər. Amerikanı isə Kanada, Meksika və Argentina təmsil edəcəklər.
Qadınların turnirinin ancaq bir iştirakçısı məlumdur - ev sahibi Braziliya. Bu yarışda cəmi 8 komanda iştirak etdiyindən, ABŞ-ın qalib gəldiyi Kazandakı dünya çempionatının nəticələri hesaba alınmır. Avropa çempionatında İspaniya, Niderland, Macarıstan, Serbiya, Rusiya, İtaliya, Almaniya, Yunanıstan, Portuqaliya, Fransa, Türkiyə və Xorvatiya mübarizə aparacaqlar. Qalib birbaşa vəsiqə əldə edir.
Niderlandda 12 komandanın yarışacağı təsnifat turnirində Amerikadan ABŞ, Kanada və Kubanın iştirakı dəqiq bilinir. Bu zonadan dünya çempionu çıxsa da, olimpiadaya birbaşa vəsiqə vermir. Avropadan yarışda 5 komanda iştirak edəcək. Asiya 2, Afrika və Okeaniya hərəyə 1təmsilçi göndərəcəklər. Sonda daha 3 olimpiya komandası bəlli olacaq.
Olimpiadada,156 kişi və 104 qadın idmançı olmaqla, 260 nəfər 20 komandanın tərkibində mübarizəyə qoşulacaq. Yarış avqustun 6-dan 20-dək Barrada Maria Lenk adına su idmanı mərkəzində keçiriləcək.
BATI YAR
|
