Bu il Azərbaycan taekvondoçuları üçün düşərli oldu. Milli komanda mötəbər beynəlxalq yarışlarda uğurlu çıxış etdi. Dünya çempionatında ardıcıl 3-cü dəfə fərqlənən dayanq ustalarımız, London olimpiadasında mübarizə aparmaq imkanı da qazandılar. Sözü gedən idman növü ölkəmizdə populyar və aparıcı olduğundan, azarkeşlər taekvondoçularımızdan daim inamlı qələbələr gözləyirlər. Bəs görəsən, taekvondoçularımız həmin məsul vəzifənin öhdəsindən gələ biləcəklərmi? Azərbaycan Taekvondo Federasiyasının I vitse-prezidenti Füzuli Musayev «İdman» qəzeti və www.idman.com.az saytına müsahibəsində bu və digər məsələlərə belə aydınlıq gətirib:
- Füzuli müəllim, il başa çatır. Yığma komanda son bir beynəlxalq yarışda mübarizə aparmaqla mövsümə yekun vuracaq. Məncə, cari il taekvondoçularımız üçün düşərli oldu. Milli komandamız vəzifəsinin öhdəsindən gələ bildi: London olimpiadasına 2 lisenziya qazandı.
- Cari mövsümü yaxşı qiymətləndirirəm. Bu il bizim çox mötəbər yarışlarımız oldu. Bildiyiniz kimi, bunlardan ən mötəbəri və vacibi Bakıda keçirilmiş dünya olimpiya təsnifatlı beynəlxalq turnir oldu. Həmin yarışa 108 ölkə qatılmışdı. Döyüşlər çox çox gərgin və güzəştsiz keçdi. Elə bunun nəticəsi idi ki, ABŞ kimi aparıcı taekvondo komandası Bakıdan lisensiyasız qetdi. Hansı ki, bu kollektivin heyətində 2-qat olimpiya və 5-qat dünya çempionu olan Stiven Lopes kimi idmançı vardı. O, 2-ci döyüşdə iranlı həmkarına məğlub olaraq, mübarizəni dayandırdı. Heyətlərində 2 olimpiya çempionu olan Meksika və 4 dünya çempionu olan İspaniya yığması da uğursuzluğa düçar oldu. Türkiyə və Fransa kimi aparıcı taekvondo komandaları hərəyə cəmi 1 vəsiqə qazandılar.
Taekvondoçularımız isə, yüksək ustalıq nümayiş etdirərək, London olimpiadasına 2 lisenziya əldə etdilər. Bunlardan biri kişi, o biri qadın idmançı oldu. Biz olimpiya oyunlarına 3-cü dəfə qatılırıq. Sevindirici hal odur ki, ilk dəfə komandamızda qadın idmançı da yer alacaq.
İl ərzində təşkil olunmuş digər beynəlxalq yarışlarda da uğurlu çıxış etmişik, mükafatlar qazanmışıq. Gənc taekvondoçularımız da bu qələbələrdən kənar qalmayıblar. Avropa birinciliyində komandamız 1 gümüş və 1 bürünc medal qazanıb. Bu onu göstərir ki, əsas milli komandaya ehtiyat qüvvə yetişir və yığmanın böyük gələcəyi var.
- Olimpiyaçılarımız da daxil olmaqla, milli komanda üzvlərinin müxtəlif yarışlarda iştirakı sürətli xarakter alıb. Bu, nə məqsədlədir?
- Formada qalmaq üçün tez-tez yarışlarda iştirak etmək labüddür. Hazırda «G-1» yarışlarına xüsusi önəm veririk. Usta taekvondoçularımız bu il həmin turnirlərdə uğurlu çıxış etdilər. Xüsusilə də, olimpiadaya lisenziya qazanmış Fəridə Əzizova ilə Ramin Əzizov.
Qeyd edim ki, Dünya Taekvondo Federasiyasının bayrağı altında keçirilən bu yarışlarda qalibə 10 reytinq xalı verir. Nə qədər xal çox olarsa, bu taekvonçuya xeyirdir. Belədə, rəsmi yarışlarda güclü idmançılar ilk mərhələlərdə bir-biriləri ilə qarşılaşmırlar. Bu, çox vacib məqamdır. İlin «ən yaxşı taekvondoçusu» seçimində xalların hesablanmasında «G-1» turnirlərin nəticələri də qeydə alınır. Nəzərinizə çatdırım ki, «Azərbaycan-Open» beynəlxalq yarışı da «G-1» statusuna malikdir və o hər il Dünya Taekvondo Federasiyasının təqviminə daxil olunacaq.
Dekabrın 1-də olimpiyaçılarımız Londona test yarışına yollanacalar. Düzü, hər növ üzrə belə sınaqlar keçirilir. Məqsəd, idmançıların mühitə və saat qurşağına uyğunlaşması, olimpiadanın ab-havasını öncədən hiss etməsidir. Ayın ortalarında Fransanın açıq çempionatında da iştirak edəcəyik. Bu yarış olimpiya çəkiləri üzrə keçiriləcəyindən və «G-1» satusu daşıdığından bizim üçün xüsusi əhəmiyyət kəsb edir. Qadın idmançılarımız hazırda Koreya paytaxtı Seulda təlim-məşq toplanışındadırlar. Onlar Fransaya birbaşa oradan gələcəklər.
- London olimpiadasına hazırlıq konsepsiyası nədən ibarətdir?
- Biz hər yarışa iddialı yollanırıq. Ortada ciddi məqsəd varsa, demək, plan da olmalıdır. Proqramda dəyişiklik etmişik. Bildiyiniz kimi, yeni qaydalara əsasən taekvondoçular döyüş zamanı elektron jiletlərdən istifadə edirlər. Hakimlərin xal vermək imkanlarının demək olar ki, 50 faizi əllərindən alınıb. Hakimlər indi yalnız başa dəyən zərbələri qiymətləndirirlər; fırlanıb vurulan tutarlı zərbələrə bir xal artıra bilirlər. Bir sözlə, yaxşı döyüş, zərbəni dəqiq yerinə yetir və xalını al.
Hər gün 2 dəfə məşq keçirik. Hazırda komandada güclü rəqabət var. İlin sonunda keçiriləcək Azərbaycan çempionatında idmançılara bir daha ustalığını nümayiş etdirmək imkanı veriləcək. Özünü yaxşı tərəfdən göstərən taekvondoçu, olimpiadaya lisenziya uğrunda yarışda iştirak etmək hüququ qazanacaq. Qeyd edim ki, bu yarışda titulundan və nəticəsindən asılı olmayaraq bütün idmançılarımız iştirak edəcək.
- Yarışlarda hakim qərəzi müşahidə olunur. Bəzən bu, idmançının sinirlərini cilovlaya bilməyərək referiyə əl qaldırmaq həddinə çatır. Olimpiadalarda Rəşad Əhmədov da az haqsızlıqla üzləşməyib. Bir sözlə, Dünya Taekvondo Federasiyası obyektivliyə doğru hansı addımlar atır? Ümumən, bununla bağlı hansı işləri görüb?
- Birincisi, bayaq qeyd etdiyim elektron jilet məsələsi qaydalarda edilən dəyişiklərdən biridir. İkincisi, Bakıda hakimlər üçün beynəlxalq seminar təşkil olundu və buradan 25 hakim dünya çempionatında ədaləti qorumaq hüququ aldı. Belə tədbirlər digər qitələrdə də keçirdi. Dünya çempionatında özünü yaxşı tərəfdən göstərmiş 60 hakim paytaxtımızda təşkil eilmiş olimpiya təsnifat turnirə dəvət aldı. Buradan isə, 25 hakim London olimpiadasında döyüşləri idarə etmək imkanı qazandı. Sevindirici haldır ki, onların sırasında bizim təmsilçimiz Oh Kvonq Çeol (Orxan) da vardı.
Dünya Taekvondo Federasiyası ədalətli hakimlik istəqamətində indi çox işlər görür. Məsul yarışlara yüksək dərəcəli hakimlər yollanırlar. Olimpiada hakim qərəzi isə həsas məsələdir. Biz hamımız bilirik ki, olimpiya oyunları sülhə, ədalətə və hümanizmə xidmət edən nüfuzlu bir tədbirdir. Ona görə, bütün idman federasiyaları orada işlərini mükəmməl qurmağa çalışırlar.
- Füzuli müəllim, digər iştirak etdiyimiz olimpiadalarla müqayisədə, bu dəfə daha artıq (2-dən çox) lisenziya qazanmaq imkanımız var. Sizcə, taekvondoçularımız sonda bunu gerçəkləşdirə biləcəklərmi?
- İlin əvvəlində Tatarıstan paytaxtı Kazanda keçiriləcək Avropa olimpiya təsnifatlı beynəlxalq turnir bizim üçün həlledicidir. Həmin yarışda 2 vəsiqə də qazanmaq imkanımız var. Çalışacağıq ki, bu fürsətdən də maksimum yararlanaq. Çünki komandanın heyətində 4 idmançı olanda, medal qazanmaq ehtimalı çox olur. Ustəlik, yeni dəyişikliklər də bizə əlavə yol açıb. İndi taekvondo yarışlarında bürünc medalı bir deyil, iki idmançı qazana bilər. Amma boks idmanından fərqli olaraq, yarımfinalda uduzanlar birbaşa 3-cü yeri tutmayacaqlar; bürünc mükafat uğrunda daha bir görüş keçirəcəklər. Biz Afina və Pekin olimpiadalarında son anda medal qazanmaq şansı qaçırmışıq. Amma atalarımız, «üçəcən» deyib. Allah etsin, bu dəfə tilsimi qıraq və Vətənə medalla qayıdaq.
Söhbətləşdi: Kamran HACI
|
