Azərbaycanda ilk futbol akademiyasının təməlini qoymaqla uşaq futboluna nə dərəcədə önəm verdiyini nümayiş etdirən “Qəbələ” Futbol Klubu, bu sahənin inkişafı istiqamətində daha bir addım atıb. İdman.com.az saytı gabalafc.az-a istinadən xəbər verir ki, daha əvvəl “Feyenoord” Futbol Akademiyasının direktoru vəzifəsində çalışmış Stenli Brard “Qəbələ” Futbol Akademiyasının direktoru postuna təyin olunub. Hollandiyalı mütəxəssis ilə 3 illik müqavilə imzalanıb. O, növbəti mövsümdən vəzifəsinin icrasına başlayacaq.
Bu gün Qəbələdə hollandiyalı mütəxəssis ictimaiyyətə təqdim olunub. Mərasimin açılışında klubun vitse-prezidenti Fariz Nəcəfov akademiyanın hədəfləri və Brard haqqında medianı məlumatlandırıb. Ardından isə yeni direktor ilkin təəssüratlarını bölüşüb və jurnalistlərin suallarını cavablandırıb:
- Gözəl sözlərə görə təşəkkürümü bildirirəm. Mən “Feyenoord” akademiyasındakı rəhbər işimi iyulun 1-dək davam etdirirəm. Gördüyümüz işlərin öhdəsindən tək gəlməmişəm. Burada olmağıma şadam. Növbəti 3 ildə Qəbələdə çalışacam. Sözügedən komandanıı seçməyimdə bəzi səbəblər var. İlkin görüşlərimizdə “Qəbələ”rəsmiləri elə ümidlə danışdılar ki, bu da məni həvəsləndirdi. İkincisi, onlar mənə bu işdə hər bir şərait yaradılacağına əmin etdilər. Burda şərait gələcək üçün çox yaxşıdır. Üçüncüsü, həmişə ölkəmdən kənarda işləməyi istəmişəm. Məşqçi heyəti ilə birlikdə bu uğurları əldə etmək istəyirəm. Ötən il 15 yaşlıların turnirində də Qəbələdə olmuşam. Bu turnir bizi yaxşı mənada təəccübləndirmişdi.
- Özünüzlə məşqçi gətirəcəksiz?
- İlk növbədə burda təhlillər aparacam. Ondan sonra buna qərar veriləcək. Məqsədimiz təkcə futbolçuların yox, eləcə də məşqçilərin təkmilləşdirilməsinə nail olmaqdır.
- Avropa klublarına “Qəbələ”dən futbolçular təklif olunacaq?
- Əsas məqsəd əsas komanda üçün futbolçu yetişdirməkdir. Əgər buna nail olsaq, o zaman onların ölkə xaricində çıxışını da təmin edə bilərik.
- Brard “Qəbələ”li futbolçuların nəyə qadir olduğunu ötən turnirdə görüb. Hansı məsuliyyətin altına girdiyinizi dərk edirsizmi?
- Əvvəl oyunlarına baxmışam. Məndə çox gözəl təəssürat yaradıblar. Bizim üçün yaşı fərqi yoxdur. Harda yaxşı futbolçu varsa, biz onları seçəcəyik. Əsasən 14-15 yaşlılara daha çox üstünlük veriləcək.
- Yaponiyada 3 il işləmisiz. Burda da 3 il işləyəcəksiz. Bu müddətin olması sizin istəyinizdir?
- Bizim rəhbərliklə birgə qərarımızdır.
- Bayaq dediniz ki, “Qəbələ”dəki infrastrukturu bəyəndiz. Məhz hansı cəhətlər xoşunuza gəldi ki, bunu Hollandiyadakı ilə müqayisə etmək olar?
- Hollandiya ilə müqayisə etdikdə Qəbələdəki ot örtüyü mənim gördüyüm ən gözəlidir. Yeni yataqxanalar haqqında da mənə deyilib. Bunları da fərqləndirə bilərəm. Ancaq mənim üçün əsas amil burda işləyən insanlardır. Onların təşkilatçılığıdır. Bu, sevindirici haldır.
- Futbolçuların təhsil məsələlərini necə tənzimləməyi düşünürsüz?
- Təhsilində uğurlu olan çalışacaq ki, futbolda da uğur qazansın. Və ya əksinə. Biz də çalışacağıq ki, bu məsələləri balanslaşdıraq. Əgər bu belə olsa, deməli həmin oyunçular ən yüksək futbolçulardır. Ancaq ola bilir ki, futbolçu futbolda yaxşı olsa da, təhsildə axsayır.
- Mayda “Feyenord” Qəbələyə beynəlxalq turnirdə iştirak etmək üçün gələcək. Siz isə həmin vaxt bu klubun akademiyasına rəhbərlik edəcəksiz. Maraqlıdır, siz hansı Akademiyanın tərəfində olacaqsız?
- Mən “Qəbələ”nin tərəfində olacam. Əsas yaxşı oyun göstərməkdir. “Qəbələ” uduzsa, amma yaxşı oyun göstərsə, məyus olmaram.
|
