Dekabrın 20-də Azərbaycanın görkəmli şahmatçısı Vüqar Həşimovun xatirəsinə həsr olunan 7-ci beynəlxalq superturnirin rapid yarışlarında daha iki turun oyunları keçirilib.
Üçüncü yarış günündə Azərbaycan Yazıçılar Birliyinin baş katibi, Xalq yazıçısı, turnirin Təşkilat Komitəsinin üzvü Çingiz Abdullayev, Milli Məclisin deputatı Şahin Hüseynzadə və “Xəzər TV”nin baş direktoru, Xalq artisti Murad Dadaşov müxtəlif lövhələrdə ilk gedişi ediblər.
Rapid yarışlarının dördüncü turunda Azərbaycan təmsilçiləri - Şəhriyar Məmmədyarov və Rauf Məmmədov üz-üzə gəliblər. İlk oyun heç-heçə yekunlaşıb. Digər şahmatçımız Vüqar Əsədli isə Macarıstan təmsilçisi Riçard Rapportla xalı yarı bölüb. Çexiyalı David Navara ABŞ idmançısı Fabiano Karuanaya uduzub. Rusiyalı Sergey Karyakin və sabiq dünya çempionu hindistanlı Vişvanatan Anandın da görüşü heç-heçə başa çatıb.
Turun cavab oyunlarında R.Məmmədov Ş.Məmmədyarov ilə xalı yarı bölüb. V.Əsədli R.Rapporta, F.Karuana D.Navaraya, V.Anand isə S.Karyakinə uduzublar.
İki oyunun nəticəsinə görə, “armagedon”da Ş.Məmmədyarov R.Məmmədov ilə, F.Karuana isə D.Navara ilə üz-üzə gəliblər. Oyunlarda Ş.Məmmədyarov və F.Karuana qələbə qazanıblar.
Beşinci turun birinci oyununda Ş.Məmmədyarov V.Anandla heç-heçə edib. V.Əsədli D.Navaraya, R.Məmmədov isə R.Rapporta məğlub olublar. S.Karyakin və F.Karuananın partiyasında xal yarı bölünüb.
Turun ikinci oyununda Ş.Məmmədyarov V.Anand ilə, S.Karyakin isə F.Karuana ilə heç-heçə ediblər. D.Navara V.Əsədliyə, R.Rapport isə R.Məmmədova qalib gəliblər.
“Armagedon”da V.Anand Ş.Məmmədyarova qalib gəlib. F.Karuana isə S.Karyakinlə heç-heçə edib. S.Karyakin 2 xal qazanıb. “Armagedon”un qaydalarına əsasən, heç-heçə qeydə alınarsa, qara fiqurlarla oynayan şahmatçı qalib elan olunur.
Turnirin reqlamentinə əsasən, rapid yarışlarında bir tur iki oyundan ibarətdir.
Beş turdan sonra R.Rapport 13 xalla turnir cədvəlində birinci, F.Karuana 11 xalla ikinci pillədə yer alıblar. S.Karyakin 10 xalla üçüncü, Ş.Məmmədyarov, D.Navara 8 xalla 4-5-ci yerləri bölüşürlər. R.Məmmədov 6 xalla altıncı, V.Anand 3 xalla yeddinci, V.Əsədli isə 1 xalla sonuncudur.
|
