Yunan-Roma və qadın güləşi üzrə milli komandalarımızın U-17 Avropa çempionatı üçün heyəti açıqlanıb

İyunun 12-dən 18-dək Albaniyanın paytaxtı Tiranada güləş üzrə U-17 Avropa çempionatı keçiriləcək. iyunun 9-da Azərbaycan Güləş Federasiyasının (AGF) təlim-məşq bazasında qitə birinciliyində ölkəmizi təmsil edəcək yunan-Roma və qadın güləşi üzrə yeniyetmələrdən ibarət komandalarla görüş olub. AGF-nin İcraiyyə Komitəsinin üzvü Fərid Mansurov, baş katib Nəsimi Musayev və federasiyanın digər rəsmi şəxsləri, eləcə də məşqçilər yeniyetmə güləşçilərə qarşıdakı məsul yarışda uğurlar arzulayıblar. Avropa çempionatının ilk günlərində yunan-Roma güləşi üzrə mübarizə baş tutacaq. Böyük məşqçi Taleh İsrafilov, məşqçilər Elvin Mürsəliyev və Rasim Ağayevin rəhbərliyi altında Turan Daşdəmirov (45 kq), Elnar Ziyadov (48 kq), Əli Seyidəlili (51 kq), Ayxan Cavadov (55 kq), Nurlan İbadzadə (60 kq), Murad Zeynalabdinov (65 kq), Cavidan Nehmətov (71 kq), Elmin Əliyev (80 kq), Mikayıl İsmayılov (92 kq) və Mahir Qurbanlı (110 kq) çıxış edəcəklər. İyunun 14-dən 16-dək isə məşqçilər Həsrət Məmmədyarov və Solmaz Adilovanın rəhbərliyi altında Səadət Quliyeva (43 kq), Esra Məmmədli (46 kq), Gülər Həbibova (53 kq), Ruzanna Məmmədova (57 kq) və Günay Qurbanova (61 kq) uğur qazanmağa çalışacaqlar. Qeyd edək ki, qitə birinciliyində beynəlxalq dərəcəli hakimlərimiz Bəşir İsazadə ilə Həbib Nurulu ədaləti qoruyacaq.

Xəbər 131 dəfə oxundu.