Bakıda keçirilən cüdo üzrə "Böyük dəbilqə" turnirində Azərbaycan cüdoçusu Məmmədəli Mehdiyev finala yüksəlib.90 kiloqram çəki dərəcəsində çıxış edən idmançı ardıcıl olaraq Con Jayne (ABŞ), Goki Tajima (Yaponiya) və Luka Maysuradzeyə (Gürcüstan) qalib gəlib. O, qızıl medal uğrunda döyüşdə Kosuke Maşiyama ilə qarşılaşacaq. Digər cüdoçularımız 100 kiloqram çəki dərəcəsində Adil Kərimli bürünc medal uğrunda Onise Seneblidze (Gürcüstan) ilə, 100 kiloqramdan yuxarı çəki dərəcəsində Uşangi Kokauri isə Sven Heynlə (Almaniya) görüşəcək.
Bu gün mübarizəyə qoşulan digər altı cüdoçu isə medalsız qalıb.
Qeyd edək ki, turnirin birinci və ikinci günlərində təmsilçilərimiz Orxan Səfərov (66 kq) qızıl, İçinxorloo Muntsxedev (57 kq) gümüş, Rövşən Əliyev (60 kq), Hidayət Heydərov (73 kq) və Elcan Hacıyev (81 kq) isə bürünc medal qazanıblar.
Heydər Əliyev adına İdman Kompleksində təşkil olunan “Böyük dəbilqə” turnirində iyirmi doqquz ölkədən 200-ə yaxın cüdoçu iştirak edir. Azərbaycan yarışda geniş heyətlə - 33 cüdoçu ilə təmsil olunur.
Xəbər 357 dəfə oxundu.