ASAPES Moskva Dövlət Beynəlxalq Münasibətlər İnstitutu ilə saziş imzaladı

Fevralın 21-də Moskva şəhərində Rusiya Federasiyası Xarici İşlər Nazirliyinin Moskva Dövlət Beynəlxalq Münasibətlər İnstitutu (MGİMO) və Azərbaycan Dövlət Bədən Tərbiyəsi və İdman Akademiyası arasında anlaşma sazişi imzalanıb. Sənədi MGİMO rektoru Anatoliy Torkunov və Azərbaycan Dövlət Bədən Tərbiyəsi və İdman Akademiyasının (ASAPES) rektoru Fuad Hacıyev imzalayıblar. Bu saziş MGİMO və ASAPES arasında elmi-tədqiqat, təhsil və konsaltinq layihələrinin, elmi-tədris tədbirlərinin, akademik və tələbə mübadiləsinin birgə həyata keçirilməsini, eləcə də digər istiqamətlərdə əməkdaşlığı nəzərdə tutur. Eyni zamanda, fevralın 21-də “İdman menecmenti” magistratura proqramının ikili diplom formasında tətbiq edilməsi haqqında iki ali təhsil müəssisəsi arasında müqavilə imzalanıb. Müqaviləyə uyğun olaraq, MGİMO və İdman Akademiyası qabaqcıl Avropa universitetlərindəki tərəfdaşlarını da “İdman menecmenti” magistr proqramının həyata keçirilməsinə cəlb edəcəklər. Qeyd olunan təhsil proqramını müvəffəqiyyətlə bitirən tələbələrə “İdman menecmenti” ixtisaslaşma dərəcəsi verilməklə MGİMO və ASAPES-in magistr diplomu təqdim ediləcək.

Xəbər 351 dəfə oxundu.