Azərbaycan qılıncoynadanı Ümumrusiya açıq turnirində yeddinci olub

Azərbaycanın kişi qılıncoynadanları şpaqa üzrə Rusiyanın Smolensk şəhərində keçirilən Ümumrusiya açıq turnirində iştirak ediblər. Şpaqaçılarımızdan ən yaxşı nəticəni Kənan Əliyev göstərib. Qrup mərhələsini 5 qələbə ilə başa vuran K.Əliyev pley-off mərhələsinin ilk görüşündə Roman Fyodorova 15:6 hesabı ilə qalib gəlib. Azərbaycan qılıncoynadanı Pavel Buzinovla görüşün əsas vaxtını 13:13 hesabı ilə bitdiyindən görüş ilk zərbəyədək edib. Burada isə 1 dəqiqə ərzində rəqibinə ilk zərbəni endirən təmsilçimiz 14:13 hesablı qələbə sayəsində ən güclü 16 şpaqaçı sırasına yüksəlib. Onaltıdabir finalda Oleq Knışa 9:15 hesabı ilə uduzan idmançımız təsəlliverici görüşlərə qatılıb. İlk təsəlliverici görüşündə İvan Limarevə 15:8 hesabı ilə qalib gələn millimizin üzvü ardınca Yeqor Lomaqanı 15:7 hesabı ilə məğlub edib. Bu qələbələr sayəsində ən güclü 8 şpaqaçı sırasına yüksələn K.Əliyev dörddəbir finalda Avropa çempionu Pavel Suxova 8:15 hesabı ilə məğlub olub. Kənan Əliyev yekun sıralamada 112 iştirakçı arasında 7-ci olub. Digər şpaqaçılarımızdan qrup mərhələsini 3 qələbə ilə başa vuran Ruslan Həsənov 1/64 finalda qrup mərhələsini 3 qələbə ilə bitirən digər idmançımız Xalid Əliyevlə üz-üzə gəlib. Şpaqaçılarımızın dueli Ruslanın 15:10 hesablı qələbəsi ilə yekunlaşıb. Növbəti mərhələdə Nikita Qlazkovu 15:9 hesabı ilə məğlub edən qılıncoynadanımız onaltıdabir finalda Georgiy Bruyevə 11:15 hesabı ilə uduzub. Şpaqaçılarımızdan Kənan Məlikzadə qrup mərhələsində 2 qələbə qazansa da, zərbələrin fərqinə görə pley-offa adlamağı bacarıb. K.Məlikzadə bu mərhələdə Aleksey Rossolova 7:15 hesabı ilə uduzub. Qrup mərhələsində 2 qələbəsi olan Barat Quliyev və turniri qələbəsiz başa vuran Fərrux Səfərov isə mübarizəni erkən dayandırıb. Turnirdə Rusiya, Azərbaycan və Estoniyanı təmsil edən şpaqaçılar yarışıblar.

Xəbər 720 dəfə oxundu.